بْـ 140 مليون درهم.. ناس ديال الجبل فأيت باها قراب يستافدو من الما دْالبحر

الهضرة سالات على مشكيل الما فْالمنطقة الجبلية ديال اشتوكة أيت باها.

المجلس ديال الجهة دْسوس ماسة، حاط فوق الطبلة ورقة ديال بصح، باش ايصادق عليها، ويعطيها الضو لخضر فالدورة ديالو، للي غاتكون غدا الاثنين بأكادير.

هادشي جا، حيت الباراج دْأهل سوس، للي كاين فأيت باها، ما بقاش كافي، ومابقاش قاد يْسكّي كلشي، والناس كثرات والحاجة للما زادت. داكشي علاش هاد المشروع ضروري، ولا قضية ديال دابا، ماشي من بعد.

من حدا البحر… حتال قلب الجبل

شنو غادي يدار بالضبط؟ المشروع فيه الخدمة ديال تْركاب القوادس والماتريال، وكاع داكشي دْالبني لي خاص، باش يضمنو أن الما ديال البحر لي كيتحلّى فالمحطة الكبيرة، لي كاينة فجماعة “إنشادن”، يوصل نقي ومقاد للريزو لي كيفرّق الما فمنطقة أيت باها. وغادي يبقاو طالعين بيه لفوق، باش تا واحد ما يبقى بلا ما وكلشي ايستافد.

شكون للي غايشارك فهاد المشروع؟

هاد المشروع مهم بزاف حيت غادي يكون شراكة بين ثلاثة دْالاطراف: المجلس دْالجهة، البيرو الوطني دْالما، والعمالة دْاشتوكة أيت باها. وهادشي كايعني أن الحل غادي يكون دايْم ومقاد على ساس صحيح. كاع الناس لّي خدامين على هاد الملف واعيين بلي خاص يزربو باش هاد المشروع يخرج للوجود فْأقرب وقت.

لفلوس منين؟ 

هاد 140 مليون درهم ماشي كلها غاتجي من بلاصة وحدة. البيرو دْالما هو لّي غادي يحط الحصة الكبيرة: 98 مليون درهم. ومجلس الجهة غادي يزيد من عندو 42 مليون درهم. كل واحد غادي يدير جهدو باش هاد الحلم يولي حقيقة.

 العين على غدا.. خاص المحطة تزيد تْكْبَرْ

واخا هادشي مهم، الناس لّي شادين هاد الملف كايشوفو بعيد، وكايقولو خاص المحطة تزيد تكبر وتوساع، باش تهني المنطقة كلها مرة وحدة، والجهة كاملة ماتبقاش تخمم فْمشكل ديال لما، لا اليوم لا غدا.