“الحكرة هادي”.. ناس فدواوير بأكادير إداوتنان كيضربو 80 كيلومتر على ورقة!..البرلماني ديواني حط سؤال على وزير الداخلية: “الناس عايشين فتمارة والعذاب، خاص الحل”

فقلب جبال جماعة إيموزار ضواحي عمالة أكادير إداوتنان، كاينين ناس عايشين المحاين ديال بصح، ماشي حيت معندهمش، ولكن حيت فالوراق تابعين لواحد الجماعة بعيدة عليهم بزاف، وخا الحوانت والمدارس والسبيطارات ديال جماعات خرين حداهم وملاصقين معاهم. هاد الحالة الواعرة هي لي خلات البرلماني جمال ديواني من حزب الاستقلال يهز الضوسي ويترافع عليه فالبرلمان بسؤال مكتوب لوزير الداخلية.

باش تفهم كثر، هاد الناس فدواوير بحال آيت ناصر وإيمسكر وتيزي، حياتهم كلها عذاب. الدراري الصغار بزز منهم يضربو طريق طويلة باش يمشيو للكوليج فجماعة تيقي ويسكنو فدار الطالب. وحتى باش يشارجيو لاكارط ديال الضو، خاصهم يتكرفصو ويمشيو بعيد. أما يلا مرض شي حد، فالله يكون معاه، حيت المركز الصحي بعيد والترونسبور قليل بزاف ولا مكانش. الكارثة الكبيرة هي ملي كيحتاج شي مواطن شي ورقة ديال المخزن، كيخصو يضرب 80 كيلومتر، مشية وجية، لمقر الجماعة ديال إيموزار.

والحاجة لي كتحير كثر، هي أن هاد الدواوير ملاصقين مع جماعة تغازوت وجماعة تامري، بيناتهم غير شي كيلومترات قلال. وأغلبية ديال الناس كيدوزو تقريبا كل نهار من تما، ولكن فالوراق تابعين لبلاصة بعيدة عليهم.

داكشي علاش البرلماني ديواني كيطلب من الوزير يشوف ليهم شي حل ديال دغيا. والحل لي باين هو يدار تقطاع إداري جديد، تقطاع ياخد بعين الاعتبار الحالة ديال هاد المنطقة، باش متبقاش هاد الحكرة، وباش حتى دوك الناس يعيشو بحال عباد الله، ويستافدو من أبسط الحقوق ديالهوم، وتوصلهوم الخدمات بلا تمارة وبلا عذاب.