البوليس فأكادير كيجاوب على تهم “الحݣرة”: حنا كنطبقو القانون على “الݣيداج فالنوار”..وخدمتنا نحميو السياحة

*البوليس ديال أكادير كيجاوْبو على الفيديو ديال “الݣيدات”: حنا ما كنحݣروش، لي دار شي حاجة ماشي قانونية كيتحاسب

على قبل واحد الفيديو كيدور، فيه واحد خينا كيݣول راه من شي جمعية وكيدوي باسم شي ناس خدامين “ݣيدات” (مرشدين) ف سوق الأحد ديال أكادير، وهاد السيد لصّق فالبوليس تهمة ديال الحݣرة والتعدي، على زعما حيت كيشدو صحاب هاد الحرفة لي خدامين بلا قانون، البوليس ديال أكادير خرجو البارح بجواب واضح، حطو فيه النقط على الحروف.

وباش كلشي يفهم شنو واقع، البوليس ديال أكادير كيݣولو بلي ديك الهضرة لي قال داك السيد على أن البوليس كيتعداو ويحݣرو، راها ماكايناش وكلها كذوب. ومنها الهضرة لي قال على الخدمة ديال الفرقة د البوليس ديال السياحة، لي هي خدمتها أصلا توقف هادشي ديال بنادم يخدم ݣيد وهو ما عندوش الرخصة. البوليس كيشدو غير دوك الناس لي ما عندهم لا وراق قانونية، لا ديك المعرفة والثقافة لي ضروري تكون عندهم باش يخدمو هاد الخدمة لي عندها قوانين ديالها.

وباش يزيدو يبيّنو كتر، البوليس كيشرحو بلي التدخلات لي كدير الفرقة ديال السياحة، الهدف منها هي أنها تّبع وتحضي كاع داكشي لي عندو علاقة بالسياحة، وتحميها من أي فعايل خايبة أو ديال الإجرام، وأول حاجة فهادشي هي الݣيداج فالنوار (بلا رخصة). وهادشي كيدار، ديما كيشدو هاد الناس وكيفتحو معاهم تحقيق، وللي ديما كيكون تحت العين ديال النيابة العامة من لّول تال لّخر.

وفنفس الوقت لي البوليس ديال أكادير كيبينو حقيقة ديال هاد الهضرة لي فالفيديو، كيعاودو يݣولو بلي الناس ديال فرقة البوليس السياحية غادي يبقاو ديما فالتيران كيديرو خدمتهم، باش يخليو السياحة فالمدينة هانية ومحمية من أي تصرفات وفعايل للي خارجة على القانون وللي كتقيس بها وهادشي كولو كيدار وهوما محتارمين، بطبيعة الحال ، داكشي لي كيݣول القانون ديال خدمتهم