“شابو” لعامل اشتوكة الصبتي: هذا هو التشخيص ديال بصح والحلول على قد المشاكل .. خلات كولشي مبهور فلقاء الفلاحة بأكادير

الكلمة القوية ديال عامل اشتوكة أيت باها، محمد سالم الصبتي، فالمجلس الإداري للمكتب الجهوي للإستثمار الفلاحي سوس ماسة ، بدات نقاش كبير، بزاف اعتبروها كتر من مجرد مداخلة إدارية، وشافو فيها أساس ديال واحد الرؤية مكمولة لي تقدر، يلا تخدم عليها، تكون هي الانطلاقة لواحد النموذج فلاحي جديد، مداخلة ماكانتش إدارية، كانت بعيدة جداً على العموميات، ف درس واعر فالتسيير والتشخيص للي كايجيب التمام، مداخلة حطات السبع على بلاصة جرح نيشان وقدمات الحلول الحقيقية ايلا بغينا فعلاً إقليم للي يسترجع بلاصتو وسط الجهة والبلاد كاملة، وعلى أن الحلول خاصها تكون على قد المشاكل لي مطروحة، وللي من بينها:

1. يزيرو السمطة على الما:

الما ولا قليل وغالي، وداكشي علاش أول حاجة هي يزيرو مع السقي وما تبقاش تضيع حتى قطرة. لي ضيع الما بحالا كيضيع مستقبل الفلاحة.

2. الطرقان لي تهرسو يتصاوبو:

دوك الكاميونات الكبار لي كيديو السلعة منهم للي خلاو الشوانط حالة. دابا خاص دغيا يتقادو باش الحركة تخفاف والسلعة توصل بلا مشاكل.

3.الخدامة يمشيو ويجيو فالأمان:

غادي يتصاوبو سبعة ديال البلايص نقيين فين يتجمعو الخدامة. باش يتهناو من روينة الطرانسبور، وبنادم يتنقل محترم راسو وفأمان الله.

4.الزبل ديال الفلاحة خاصو حل: داكشي لي كتشيط الفوارم ولا خانق الدنيا. خاص يتلقا حل باش داك الزبل يتعالج ويستافد منو، حسن ما يبقا غير كيلوث فالأرض والما..

5.حتى الناس ديال الجبل فالحساب: الفلاحة ديال الجبل حتا هي غادي تتعاون. غادي يكون عوين خاص للناس لي خدامين على أركان والعسل والعشوب، باش حتا ديك البلاصة تزيد للقدام والناس تعيش فيها بيخير.

ونقطة أخرى مهمة:

العامل الصبتي، متنساش قضية العقار ف المدارات السقوية العصرية والتقليدية، وقضية الكسّابة الرحّل وطلب باش هاد المشكل حتى هو لي قديم يتلقا ليها الحل للي فيه الخير للجميع.